హిట్‌ అండ్‌ రన్‌ కేసులో అస్సామీ నటి నందినీ కశ్యప్‌ను గువాహటి పోలీసులు ఇవాళ అరెస్టు చేశారు. జూలై 25న తెల్లవారుజామున 3 గంటల ప్రాంతంలో నందినీ కశ్యప్‌ తన కారుతో 21 ఏళ్ల పాలిటెక్నిక్ విద్యార్థి సమియుల్ హక్ను ఢీకొట్టి, అక్కడి నుంచి పారిపోయినట్లు పోలీసులు తెలిపారు. తీవ్రంగా గాయపడిన సమియుల్, ఆసుపత్రిలో చికిత్స పొందుతూ మంగళవారం రాత్రి మరణించాడు.

పోలీసులు, ప్రత్యక్ష సాక్షుల వివరాల ప్రకారం, ప్రమాదం జరిగిన సమయంలో నందినీ కశ్యప్‌ తన కారును గంటకు 120 కిలోమీటర్ల కంటే ఎక్కువ వేగంతో నడుపుతోంది. ప్రమాదం జరిగిన వెంటనే ఆమె ఆగి, సాయం చేయకుండా వెళ్లిపోయిందని ప్రత్యక్ష సాక్షులు తెలిపారు. సమియుల్‌ను స్థానికులు ఆసుపత్రికి తరలించారు. ఈ ఘటనపై కేసు నమోదు చేసుకున్న గువాహటి పోలీసులు సీసీటీవీ ఫుటేజ్ ఆధారంగా దర్యాప్తు చేసి, నందినీ కశ్యప్‌ను బుధవారం ఉదయం ఉత్తర గౌహటిలోని రాజధాని థియేటర్ రిహార్సల్ వద్ద అరెస్టు చేశారు.

మృతుడు సమియుల్ హక్‌కు తీవ్రమైన తల గాయాలు, రెండు కాళ్లకు పలు పగుళ్లు, తొడ, చేయి ఎముకలు విరిగినట్లు వైద్యులు తెలిపారు. మొదట బెయిల్ లభించే సెక్షన్ల కింద కేసు నమోదు చేసినప్పటికీ, బాధితుడు మరణించడంతో పోలీసులు హత్య అభియోగాలను చేర్చారు. పోలీసులు నందినీ కశ్యప్‌ కారును కూడా సీజ్ చేశారు. ఈ కేసు దర్యాప్తులో నందినీ కశ్యప్‌ సహకరించడం లేదని, తన ప్రమేయాన్ని తోసిపుచ్చుతోందని పోలీసులు తెలిపారు. ఈ ఘటనపై సమియుల్ కుటుంబం న్యాయం కోరుతోంది.