‘నాటు నాటు’ పాటతో ప్రపంచవ్యాప్తంగా ఖ్యాతి పొందిన ప్రముఖ గాయకుడు రాహుల్ సిప్లిగంజ్కు తెలంగాణ ప్రభుత్వం కోటి రూపాయల నగదు పురస్కారాన్ని ప్రకటించింది. ఇవాళ బోనాల వేడుక సందర్భంగా సీఎం రేవంత్ రెడ్డి ఈ ప్రకటన చేశారు. పాతబస్తీ నుంచి వచ్చి అంతర్జాతీయ స్థాయికి ఎదిగిన రాహుల్ సిప్లిగంజ్ తెలంగాణ యువతకు ఆదర్శమని సీఎం కొనియాడారు.
సీఎం హామీ నెరవేరింది
గత అసెంబ్లీ ఎన్నికలకు ముందు, అప్పటి టీపీసీసీ అధ్యక్షుడిగా ఉన్న రేవంత్ రెడ్డి రాహుల్ సిప్లిగంజ్కు రూ. 10 లక్షల ఆర్థిక సాయం ప్రకటించారు. కాంగ్రెస్ ప్రభుత్వం అధికారంలోకి వస్తే రాహుల్కు కోటి రూపాయల బహుమతి అందిస్తానని అప్పుడే హామీ ఇచ్చారు. ‘నాటు నాటు’ పాట ఆస్కార్ అవార్డు గెలుచుకున్న తర్వాత రాహుల్కు రాష్ట్ర ప్రభుత్వం తరపున గుర్తింపు లభించలేదని రేవంత్ రెడ్డి గతంలో విమర్శించారు.
కాంగ్రెస్ ప్రభుత్వం అధికారంలోకి వచ్చిన తర్వాత, గద్దర్ ఫిల్మ్ అవార్డుల ప్రదానోత్సవంలో కూడా సీఎం రేవంత్ రెడ్డి రాహుల్ సిప్లిగంజ్ గురించి ప్రస్తావించి, త్వరలోనే ఒక ప్రకటన చేస్తామని హామీ ఇచ్చారు. ఇచ్చిన మాట ప్రకారం, నేడు బోనాల పండుగను పురస్కరించుకొని తెలంగాణ ప్రభుత్వం రాహుల్ సిప్లిగంజ్కు రూ. కోటి నగదు పురస్కారాన్ని ప్రకటించి, మంజూరు చేసింది. ఈ ప్రకటనతో రాహుల్ సిప్లిగంజ్ అభిమానులు, తెలుగు సినీ లోకం సంతోషం వ్యక్తం చేస్తున్నారు.
రాహుల్ సిప్లిగంజ్ ‘నాటు నాటు’ పాటను కాల భైరవతో కలిసి ఆలపించారు. ఈ పాటకు ఎం.ఎం. కీరవాణి సంగీతం అందించగా, చంద్రబోస్ సాహిత్యం అందించారు. ఈ పాట 95వ ఆస్కార్ అవార్డుల వేడుకలో ఉత్తమ ఒరిజినల్ సాంగ్ విభాగంలో ఆస్కార్ గెలుచుకుని చరిత్ర సృష్టించింది.
