తెలుగు చిత్ర పరిశ్రమలో విషాదం నెలకొంది. విలక్షణ నటుడు, తనదైన శైలితో ప్రేక్షకులను అలరించిన ఫిష్ వెంకట్ (53) శుక్రవారం రాత్రి హైదరాబాద్లో తుదిశ్వాస విడిచారు. కొంతకాలంగా కిడ్నీ సంబంధిత సమస్యలతో బాధపడుతున్న ఆయన ప్రైవేట్ ఆసుపత్రిలో చికిత్స పొందుతూ మరణించారు.
ఆయన అసలు పేరు మంగళంపల్లి వెంకటేష్. ముషీరాబాద్ మార్కెట్లో చేపల వ్యాపారం చేయడంతో ఆయనకు “ఫిష్ వెంకట్”గా గుర్తింపు వచ్చింది. వి.వి. వినాయక్ దర్శకత్వంలో వచ్చిన ‘ఆది’ చిత్రంలోని ‘తొడకొట్టు చిన్నా’ అనే డైలాగ్తో ఆయనకు విశేష గుర్తింపు లభించింది. ఆ తర్వాత వెనుదిరిగి చూడకుండా సుమారు 100కి పైగా చిత్రాల్లో నటించి తనదైన ముద్ర వేశారు.
‘దిల్’, ‘బన్నీ’, ‘నాయక్’, ‘అత్తారింటికి దారేది’, ‘గబ్బర్ సింగ్’, ‘డీజే టిల్లు’, ‘కింగ్’, ‘డాన్ శీను’, ‘మిరపకాయ్’, ‘సుప్రీమ్’ వంటి ఎన్నో విజయవంతమైన చిత్రాల్లో ఆయన కీలక పాత్రలు పోషించారు. తన సహజమైన నటన, ప్రత్యేకించి విలన్ గ్యాంగ్లో ఒకరిగా, లేదా హాస్య ప్రధానమైన పాత్రల్లో ఆయన జీవించారు. చివరిగా ‘కాఫీ విత్ ఏ కిల్లర్’ చిత్రంలో కనిపించారు.
ఫిష్ వెంకట్ రెండు కిడ్నీలు పాడైపోవడంతో డయాలసిస్ చికిత్స తీసుకున్నారు. కిడ్నీ మార్పిడి అవసరమని వైద్యులు సూచించినా, ఆర్థిక ఇబ్బందుల వల్ల అది సాధ్యం కాలేదని కుటుంబ సభ్యులు తెలిపారు. ఆయన చికిత్సకు సినీ ప్రముఖులు పలువురు ఆర్థిక సహాయం అందించినా, విధి వక్రించి ఆయనను దూరం చేసింది.
ఫిష్ వెంకట్ మృతి పట్ల టాలీవుడ్లోని పలువురు నటులు, దర్శకులు, నిర్మాతలు తమ ప్రగాఢ సానుభూతిని తెలియజేశారు. ఆయన ఆకస్మిక మరణం సినీ పరిశ్రమకు తీరని లోటని అభిప్రాయపడ్డారు. ఆయన లేని లోటు స్పష్టంగా కనిపిస్తుందని పలువురు ప్రముఖులు గుర్తు చేసుకున్నారు.
