భారతీయ సినీ చరిత్రలో తనదైన ముద్ర వేసిన అలనాటి అగ్రతార, “అభినయ సరస్వతి” బి. సరోజా దేవి (87) సోమవారం (జులై 14) బెంగళూరులోని తన నివాసంలో వృద్ధాప్య సంబంధిత అనారోగ్యాలతో కన్నుమూశారు. ఆమె మరణం సినీ లోకాన్ని, కోట్లాది మంది అభిమానులను తీవ్ర విషాదంలో ముంచెత్తింది. ఆమె సుదీర్ఘమైన, ఘనమైన సినీ కెరీర్ గురించి మరోసారి సినీ ప్రముఖులు, అభిమానులు స్మరించుకుంటున్నారు.
సినిమాల్లోకి అనుకోని ప్రవేశం
1938 జనవరి 7న బెంగళూరులో జన్మించిన సరోజా దేవికి చిన్నతనం నుంచీ సినిమాలంటే పెద్దగా ఆసక్తి లేదని, సన్యాసిని కావాలని అనుకునేవారని గతంలో అనేక ఇంటర్వ్యూలలో చెప్పుకొచ్చారు. అయితే, ఆమె జీవితం అనుకోని మలుపు తిరిగింది. 13 ఏళ్ల వయసులోనే ఒక నాటక ప్రదర్శనలో ఆమె నటనను చూసిన కన్నడ ప్రముఖ దర్శక నిర్మాత హొన్నప్ప భాగవతార్, తన “మహాకవి కాళిదాస” (1955) చిత్రంలో అవకాశం ఇచ్చారు. తొలి సినిమాతోనే అద్భుతమైన నటనతో ఆకట్టుకున్న సరోజా దేవి, అనతికాలంలోనే కన్నడ సినీ పరిశ్రమలో స్టార్గా ఎదిగారు.
అగ్ర హీరోల సరసన అగ్రతారగా
ఆ తర్వాత ఆమెకు తెలుగు, తమిళ, హిందీ చిత్ర పరిశ్రమల నుంచి వరుసగా అవకాశాలు వెల్లువెత్తాయి. 1957లో ఎన్టీఆర్ సరసన “పాండురంగ మహాత్యం” చిత్రంతో తెలుగు సినీ రంగ ప్రవేశం చేశారు. ఈ సినిమా భారీ విజయాన్ని సాధించి, ఆమెకు తెలుగులో మంచి గుర్తింపు తెచ్చింది. తమిళంలో ఎం.జి.ఆర్.తో కలిసి నటించిన “నాడోడి మన్నన్” (1958) ఆమెను తమిళ చిత్రసీమలో అగ్రతారగా నిలిపింది. ఎం.జి.ఆర్, ఎన్టీఆర్, ఏఎన్నార్, శివాజీ గణేశన్, దిలీప్ కుమార్ వంటి దిగ్గజ నటుల సరసన నటించి, వారి ‘గోల్డెన్ పెయిర్’గా పేరు పొందారు. దాదాపు 200కి పైగా చిత్రాల్లో నటించి, భారతీయ సినిమా చరిత్రలో తనకంటూ ఒక ప్రత్యేక స్థానాన్ని సంపాదించుకున్నారు.
రికార్డులు, పురస్కారాలు
సరోజా దేవి కెరీర్లో ఎన్నో రికార్డులు, పురస్కారాలు ఉన్నాయి. 1955 నుండి 1984 వరకు 29 ఏళ్ల పాటు 161 సినిమాల్లో ప్రధాన పాత్రధారిగా నటించి ప్రపంచ రికార్డు సృష్టించారు. సినీ రంగానికి ఆమె చేసిన సేవలకు గాను కేంద్ర ప్రభుత్వం ఆమెను 1969లో పద్మశ్రీతో, 1992లో పద్మభూషణ్తో సత్కరించింది. అంతేకాకుండా, ఆమెకు కలైమామణి పురస్కారం, బెంగళూరు విశ్వవిద్యాలయం నుంచి గౌరవ డాక్టరేట్ వంటివి లభించాయి. 2009లో ఎన్టీఆర్ నేషనల్ అవార్డును కూడా అందుకున్నారు.
వ్యక్తిగత జీవితం
సరోజా దేవి 1967లో శ్రీహర్షను వివాహం చేసుకున్నారు. 1986లో తన భర్త మరణంతో తీవ్ర మనోవేదనకు గురయ్యారు. కొన్నాళ్లపాటు సినిమాలకు దూరంగా ఉన్నారు. ఆ తర్వాత తిరిగి వచ్చినా, కొత్త చిత్రాలు ఒప్పుకోకుండా, అప్పటికి ఒప్పందాలు కుదిరిన చిత్రాలను మాత్రమే పూర్తి చేశారు. తన కెరీర్ మొత్తంలో ఒక్క గాసిప్ కూడా లేకుండా గడపడం తన అదృష్టమని, అది తనను ముందుకు నడిపిందని ఆమె పలు సందర్భాల్లో పేర్కొన్నారు.
