గువాహటి వేదికగా జరిగిన వన్డే మ్యాచ్‌లో టీమిండియా స్టార్ ఓపెనర్ రోహిత్ శర్మ సాధించిన శతకం కేవలం ఒక మైలురాయి స్కోరు మాత్రమే కాకుండా భారత క్రికెట్‌లోనే ఒక కీలకమైన మలుపుగా మారింది. మూడంకెల స్కోరు అందుకున్న వెంటనే మైదానంలో రోహిత్ చేసిన స్పెషల్ సెలబ్రేషన్లు సోషల్ మీడియాలోనూ, క్రికెట్ విశ్లేషకుల్లోనూ ఊపేస్తున్నాయి. మ్యాచ్ అనంతరం ఈ విచిత్ర వేడుక గురించి విలేకరులు ప్రశ్నించగా, “అది నా వ్యక్తిగతం, బయటకు చెప్పకూడదు” అని రోహిత్ శర్మ చిరునవ్వుతో దాటవేసినప్పటికీ, ఆ నవ్వు వెనుక తన ఆత్మగౌరవం, టీమ్ మేనేజ్‌మెంట్‌కు పంపిన తీవ్రమైన హెచ్చరిక దాగి ఉందనేది క్రీడా విశ్లేషకుల అభిప్రాయంగా ఉంది.

రాబోయే 2027 వన్డే ప్రపంచకప్ ప్రణాళికల్లో రోహిత్ శర్మకు చోటు లేదని, భవిష్యత్ జట్టు నిర్మాణంలో భాగంగా యువ ఆటగాళ్లకు ప్రాధాన్యం ఇవ్వాలని హెడ్ కోచ్ గౌతమ్ గంభీర్ భావిస్తున్నారనే ప్రచారం జరుగుతున్న తరుణంలో ఈ శతకం ప్రాధాన్యత సంతరించుకుంది. గంభీర్ ఆలోచనలకు చెక్ పెడుతూ, “నేను ఇప్పటికీ కేవలం హిట్టర్‌ను మాత్రమే కాదు… వికెట్ల మధ్య వేగంగా పరిగెత్తే పూర్తి ఫిట్‌నెస్ ఉన్న ఫిట్టర్‌‌ను కూడా!” అని భారత మేనేజ్‌మెంట్‌కు, కోచ్ గంభీర్‌కు రోహిత్ శర్మ మైదానం వేదికగా పవర్ ఫుల్ సిగ్నల్ ఇచ్చారు.

రన్నింగ్ సెలబ్రేషన్: సైలెంట్ సమాధానం

సాధారణంగా శతకం దాటగానే ఆకాశం వైపు చూడటం, బ్యాట్ ఎత్తడం లేదా హెల్మెట్ తీసి ముద్దు పెట్టుకోవడం రోహిత్ శర్మ శైలిగా ఉండేది. కానీ గువాహటి వన్డేలో రోహిత్ తీరు పూర్తిగా భిన్నంగా కనిపించింది; శతకం మార్కు దాటగానే ఆనందంలో గెంతులేశాడు. పరిగెడుతూ వినూత్నంగా వేడుక చేసుకున్నారు.

ఈ మధ్యకాలంలో రోహిత్ శర్మ వయసు, ఫిట్‌నెస్, రన్నింగ్ బిట్వీన్ ద వికెట్స్‌పై సోషల్ మీడియాలో, బోర్డు వర్గాల్లో సాగుతున్న చర్చలకు ఈ వేడుక ద్వారా ఆయన సైలెంట్‌గా సమాధానం ఇచ్చారు. తన ఫిట్‌నెస్ గురించి మాట్లాడేవారు తన పరుగులను చూడాలని, తన ఫిట్‌నెస్, పట్టుదలపై తనకు ఉన్న నమ్మకాన్ని ఈ ‘రన్నింగ్’ ద్వారా నిరూపించారు.

గౌతమ్ గంభీర్ వర్సెస్ రోహిత్ శర్మ

భారత హెడ్ కోచ్‌‌గా గౌతమ్ గంభీర్ బాధ్యతలు స్వీకరించినప్పటి నుంచి జట్టు ఎంపికలో కొత్త శకం ప్రారంభమైంది. రాబోయే 2027 వన్డే ప్రపంచకప్ నాటికి రోహిత్ శర్మ వయసు 40 ఏళ్లకు చేరువవుతుండటంతో, భవిష్యత్ జట్టును నిర్మించేందుకు యువ ఆటగాళ్లకు ప్రాధాన్యం ఇవ్వాలనేది గంభీర్ వ్యూహంగా ఉంది. రాబోయే మెగా టోర్నీ కోసం రోహిత్‌ను వన్డే జట్టు ప్రణాళికల్లో ప్రాథమిక ఎంపికగా గంభీర్ పరిగణించడం లేదని, ఈ విషయమై రోహిత్‌తో వ్యక్తిగతంగా చర్చించారని సమాచారం అందుతోంది.

అయితే, పొట్టి ఫార్మాట్‌కు గుడ్‌బై చెప్పి కేవలం వన్డేలు, టెస్టులపై మాత్రమే దృష్టి సారించిన రోహిత్ శర్మ, 2027 వన్డే ప్రపంచకప్‌లో ఆడాలనే బలమైన కోరికతో ఉన్నారు. ఈ నేపథ్యంలో కోచ్ గంభీర్ ఆలోచనలకు, కెప్టెన్ రోహిత్ ఆశయాలకు మధ్య నడుస్తున్న సైలెంట్ వార్‌కు ఈ గువాహటి శతకం ప్రత్యక్ష వేదికగా మారింది.

అద్భుత ఫామ్‌లో హిట్‌మ్యాన్

రోహిత్ శర్మ కెరీర్ ముగిసిపోయిందని లేదా ఆయన ఫామ్ తగ్గిందని భావించేవారికి గత కొన్ని వన్డేల గణాంకాలే స్పష్టమైన జవాబు ఇస్తున్నాయి. 2023 వన్డే ప్రపంచకప్‌ నుంచి రోహిత్ శర్మ తన బ్యాటింగ్ శైలిని పూర్తిగా మార్చుకుని, మొదటి 10 ఓవర్లలోనే మ్యాచ్‌ను ప్రత్యర్థికి దూరం చేసేలా పవర్‌ప్లేలో అగ్రెసివ్ ఓపెనింగ్ అందిస్తున్నారు.

గత 15-20 వన్డేల్లో రోహిత్ శర్మ సగటు 50కి పైగా ఉండటమే కాకుండా, ఆయన స్ట్రైక్ రేట్ 120కి పైగా కొనసాగుతోంది. కేవలం భారీ శతకాలే కాకుండా, ప్రతి మ్యాచ్‌లోనూ జట్టుకు శుభారంభం అందిస్తూ 40, 50, 80 ప్లస్ స్కోర్లను వేగంగా సాధిస్తున్నారు.

ఇంత అద్భుతమైన ఫామ్‌లో ఉన్న దిగ్గజ బ్యాటర్‌‌ను కేవలం వయసు సాకుగా చూపి పక్కన పెట్టడం సమంజసం కాదని క్రికెట్ ప్రేమికులు, అభిమానులు భావిస్తున్నారు.

ఓపెనర్‌గా రోహిత్ శర్మ సాధించిన ప్రపంచ రికార్డులు

వన్డే క్రికెట్ చరిత్రలో మిడిలార్డర్ బ్యాటర్‌గా కెరీర్ ప్రారంభించి, ఆ తర్వాత ఓపెనర్‌గా మారి ప్రపంచంలోనే అత్యుత్తమ బ్యాటర్‌గా ఎదిగిన రికార్డు రోహిత్ శర్మది. వన్డే చరిత్రలో ఏకంగా మూడు డబుల్ సెంచరీలు (209, 264, 208*) సాధించిన ఏకైక బ్యాటర్ రోహిత్ శర్మ. వన్డేల్లో అత్యధిక వ్యక్తిగత స్కోరు (264) రికార్డు కూడా ఆయన పేరిటే ఉంది.

2019 వన్డే ప్రపంచకప్‌లో ఏకంగా 5 శతకాలు సాధించి ఒకే ప్రపంచకప్‌లో అత్యధిక శతకాలు చేసిన ఆటగాడిగా నిలిచారు. అంతర్జాతీయ క్రికెట్‌లో అత్యధిక సిక్సర్లు బాదిన బ్యాటర్‌గా దిగ్గజాలను దాటి రోహిత్ మొదటి స్థానంలో నిలిచారు. వన్డేల్లో ఓపెనర్‌గా 50కి పైగా సగటు కలిగి ఉండి, అత్యంత వేగంగా 8000 కంటే ఎక్కువ పరుగులు సాధించిన ఓపెనర్లలో ఒకరిగా నిలిచారు.

గువాహటిలో సాధించిన శతకం ద్వారా రోహిత్ శర్మ స్పష్టమైన సందేశాన్ని ఇచ్చారు. తన ఫిట్‌నెస్ లేదా బ్యాటింగ్ సామర్థ్యాన్ని సందేహిస్తే మైదానంలో పరుగెత్తి, బంతిని సరిహద్దు దాటించి నిరూపిస్తానని, తాను కేవలం ‘హిట్టర్’ మాత్రమే కాక ‘ఫిట్‌గా కూడా ఉన్నానని స్పష్టం చేశారు.

రోహిత్ ఈ శతకంతో తన ఫామ్‌ను నిరూపించుకుని బంతిని గంభీర్ కోర్టులోకి విసిరారు. రాబోయే సిరీస్‌లలో గౌతమ్ గంభీర్ తన నిర్ణయాన్ని మార్చుకుంటారా లేక యంగ్‌స్టర్స్ ఫార్ములాకే కట్టుబడి ఉంటారా అనేది ఆసక్తికరంగా మారింది.