రౌడీ స్టార్ విజయ్ దేవరకొండ నటించిన భారీ యాక్షన్ డ్రామా “కింగ్డమ్”. ఈ సినిమా జూలై 31న ప్రపంచవ్యాప్తంగా విడుదల కానున్న విషయం తెలిసిందే. ఈ చిత్రం తెలుగుతో పాటు ఇతర భాషల్లోనూ ప్రేక్షకుల ముందుకు రానుంది. తాజాగా ఈ సినిమా హిందీ వెర్షన్ టైటిల్ను మేకర్స్ ప్రకటించారు. హిందీలో “కింగ్డమ్” చిత్రాన్ని “సామ్రాజ్య” పేరుతో జూలై 31నే విడుదల చేయనున్నారు.
గౌతమ్ తిన్ననూరి దర్శకత్వంలో రూపొందిన “కింగ్డమ్” చిత్రంపై భారీ అంచనాలు నెలకొన్నాయి. ఒక వ్యక్తి ప్రతీకారం, మోసం, సామ్రాజ్యం చుట్టూ తిరిగే కథాంశంతో ఈ సినిమా తెరకెక్కింది. విజయ్ దేవరకొండ సరికొత్త గెటప్లో కనిపించనున్న ఈ చిత్రంలో భాగ్యశ్రీ బోర్సే హీరోయిన్గా నటించగా, సత్యదేవ్ కీలక పాత్రలో కనిపించనున్నారు. అనిరుధ్ రవిచందర్ సంగీతం అందించారు.
కొన్ని రోజుల క్రితం, “కింగ్డమ్” హిందీలో విడుదల కావడం లేదని పుకార్లు చెలరేగాయి. అయితే, ఈ పుకార్లకు చెక్ పెడుతూ, చిత్ర యూనిట్ “సామ్రాజ్య” పేరుతో హిందీ విడుదల తేదీని అధికారికంగా ప్రకటించింది. ప్రముఖ డిస్ట్రిబ్యూషన్ సంస్థ AA ఫిలిమ్స్ ఈ సినిమా హిందీ హక్కులను దక్కించుకుంది.
ఈ చిత్రం విజయ్ దేవరకొండ కెరీర్లో ఒక ముఖ్యమైన సినిమాగా భావిస్తున్నారు. గత కొన్ని చిత్రాలతో ఆశించిన ఫలితాలు రాకపోయినా, “కింగ్డమ్”పై అభిమానులు, సినీ విమర్శకులు భారీ అంచనాలు పెట్టుకున్నారు. టీజర్, పాటలకు లభించిన స్పందన సినిమాపై మరింత హైప్ను పెంచింది. జూలై 31న “సామ్రాజ్య” హిందీలో ఎలాంటి ప్రభంజనం సృష్టిస్తుందో చూడాలి.
