పశ్చిమ బెంగాల్ రాజకీయాల్లోనూ, బెంగాలీ చిత్రసీమ వర్గాల్లోనూ తీవ్ర సంచలనం రేకెత్తిస్తూ ప్రముఖ నటి కోయెల్ మల్లిక్ (అసలు పేరు రుక్మిణి మల్లిక్) భారతీయ జనతా పార్టీ (BJP) లో చేరారు. పశ్చిమ బెంగాల్‌‌లోని ఖాళీగా ఉన్న రాజ్యసభ స్థానానికి బిజెపి యాజమాన్యం కోయెల్ మల్లిక్‌‌ను తమ అధికారిక అభ్యర్థిగా ప్రకటించిన మరుసటి రోజే, అంటే అక్టోబర్ 5న కోల్‌కతాలోని 6 మురళీధర్ సేన్ లేన్‌లో ఉన్న రాష్ట్ర బిజెపి ప్రధాన కార్యాలయంలో ఆమె అధికారికంగా పార్టీ సభ్యత్వం తీసుకున్నారు. పశ్చిమ బెంగాల్ ముఖ్యమంత్రి సువేందు అధికారి, రాష్ట్ర బిజెపి అధ్యక్షుడు సమీక్ భట్టాచార్య, పార్టీ ప్రధాన కార్యదర్శి శశి కసోచ్ సమక్షంలో ఆమె కాషాయ కండువా కప్పుకున్నారు.

కేవలం ఆరు నెలల వ్యవధిలోనే తృణమూల్ కాంగ్రెస్ పార్టీ ఎంపీగా బాధ్యతలు చేపట్టి, ఆ తర్వాత రాజీనామా చేసి, ఇప్పుడు బిజెపి రాజ్యసభ అభ్యర్థిగా ఎంపిక కావడం బెంగాల్ రాజకీయ వర్గాల్లో తీవ్ర చర్చనీయాంశంగా మారింది. బిజెపిలో చేరిన అనంతరం మీడియా ప్రతినిధులతో కోయెల్ మల్లిక్ మాట్లాడుతూ, “ఇంతటి భారీ బాధ్యతను నాపై ఉంచినందుకు ఎంతో గౌరవంగా భావిస్తున్నాను. ప్రజాసేవ అనేది ఒక బాధ్యత, దానిని సంతోషంగా నెరవేరుస్తాను. పశ్చిమ బెంగాల్‌లో జరుగుతున్న అభివృద్ధి సంక్షేమ కార్యక్రమాలను చూసి ఆనందిస్తున్నాను; ప్రస్తుతం బెంగాల్ రాష్ట్రానికి అత్యంత అవసరమైనది ఇదే” అని పేర్కొన్నారు.

తృణమూల్ ఎంపీ స్థాయి నుంచి బిజెపి అభ్యర్థి వరకు!

కోయెల్ మల్లిక్ రాజకీయ ప్రయాణం ఈ ఏడాది అత్యంత వేగవంతమైన మలుపులు తిరిగింది. 2026 ఫిబ్రవరి 27న పశ్చిమ బెంగాల్ నుంచి రాజ్యసభ ఎన్నికలకు తృణమూల్ కాంగ్రెస్ పార్టీ నలుగురు అభ్యర్థుల పేర్లను ప్రకటించగా, అందులో కోయెల్ మల్లిక్ పేరు ప్రముఖంగా నిలిచింది. ఆ తర్వాత ఏప్రిల్ 6, 2026న ఆమె తృణమూల్ ఎంపీగా భారత పార్లమెంట్ రాజ్యసభలో ప్రమాణ స్వీకారం చేశారు. జూన్ 3న ఆమె కార్మిక, జౌళి, నైపుణ్యాభివృద్ధికి సంబంధించిన పార్లమెంటరీ స్టాండింగ్ కమిటీ సభ్యురాలిగా నియమితులయ్యారు.

అయితే, ఊహించని రీతిలో జూలై 16, 2026న ఆమె తన రాజ్యసభ సభ్యత్వానికి, తృణమూల్ కాంగ్రెస్‌కు రాజీనామా చేశారు. రాజీనామా చేసిన కొద్దిరోజుల్లోనే ఢిల్లీలోని కేంద్ర మంత్రి భూపేందర్ యాదవ్ నివాసంలో ఆయనను కలవడం ప్రాధాన్యత సంతరించుకుంది. అనంతరం అక్టోబర్ 4న బిజెపి అధిష్టానం ఆమె ఖాళీ చేసిన రాజ్యసభ స్థానానికి ఆమెనే తిరిగి తమ అభ్యర్థిగా ఖరారు చేసింది. తృణమూల్ కాంగ్రెస్‌ను వీడటంపై మీడియా ప్రశ్నించగా.. “నాకు వారిపై ఎలాంటి కోపం లేదు. బహుశా నేను సైకాలజీ విద్యార్థిని కావడం వల్ల నాకు ఇతరుల పట్ల సహానుభూతి ఎక్కువైందేమో” అని వ్యాఖ్యానించడం విశేషం.

సైకాలజీ గ్రాడ్యుయేట్ నుంచి స్టార్ హీరోయిన్ వరకు

1982 ఏప్రిల్ 28న కోల్‌కతాలోని ప్రసిద్ధ ‘మల్లిక్ బారీ’ (భవానీపూర్) కుటుంబంలో జన్మించిన కోయెల్ మల్లిక్, బెంగాలీ దిగ్గజ నటుడు రంజిత్ మల్లిక్, దీపా మల్లిక్‌ల కుమార్తె. కోల్‌కతాలోని మోడరన్ హైస్కూల్ ఫర్ గర్ల్స్‌లో పాఠశాల విద్యను, గోఖలే మెమోరియల్ గర్ల్స్ కాలేజీ (కలకత్తా విశ్వవిద్యాలయం) నుంచి సైకాలజీలో బి.ఎస్సీ ఆనర్స్ పూర్తి చేశారు. ప్రారంభంలో సైకాలజిస్ట్ కావాలని భావించినప్పటికీ, కాలేజీ రోజుల్లోనే ఊహించని రీతిలో చిత్రసీమలోకి అడుగుపెట్టారు.

2003లో హరనాథ్ చక్రవర్తి దర్శకత్వంలో, సమరేష్ బాసు నవల ఆధారంగా తెరకెక్కిన ‘నాటేర్ గురు’ చిత్రంలో హీరో జీత్ సరసన కథానాయికగా పరిచయమై తొలి చిత్రంతోనే విపరీతమైన విజయాన్ని అందుకున్నారు. ఆ తర్వాత ‘బంధన్’ (2004), ‘శుభదృష్టి’ (2005), ‘ఎమ్‌ఎల్ఏ ఫటాకేష్టో’ (2006), ‘మోన్ మానే నా’ (2008), ‘పగ్లు’ (2011), ‘హెమ్‌లాక్ సొసైటీ’ (2012), ‘బేష్ కోరేచీ ప్రేమ్ కోరేచీ’ (2015) వంటి సూపర్ హిట్ చిత్రాలతో బెంగాలీ చిత్రసీమలో ‘టాలీ-క్వీన్’గా నిలిచారు. సుచిత్ర భట్టాచార్య నవలల ఆధారంగా తెరకెక్కిన ‘మిటిన్ మాషి’ ఫ్రాంచైజీలో మహిళా డిటెక్టివ్ పాత్రలో నటించి విమర్శకుల ప్రశంసలు పొందారు.

తాజా చిత్రం ‘స్వార్థపొర్’ & గౌరవ పురస్కారాలు

ఇటీవల 2025లో విడుదలైన ‘స్వార్థపొర్’ చిత్రంలో తన తండ్రి, దిగ్గజ నటుడు రంజిత్ మల్లిక్ ,కౌశిక్ సేన్‌లతో కలసి ఆమె ‘అపర్ణ’ అనే పాత్రలో ఎలాంటి మేకప్ లేకుండా అత్యంత సహజ సిద్ధమైన నటనను కనబరిచారు. కళారంగానికి ఆమె చేసిన సేవలకుగాను పశ్చిమ బెంగాల్ ప్రభుత్వం అత్యున్నత ‘మహానాయక్ సమ్మాన్’ (2023)తో పాటు, ఫిల్మ్‌ఫేర్ అవార్డ్స్ బంగ్లా, రెండు బిఎఫ్‌జెఎ అవార్డులు, ఆనందలోక్ పురస్కారాలను అందుకున్నారు.

వ్యక్తిగత జీవిత విషయానికి వస్తే, 2013లో ప్రముఖ ప్రొడ్యూసర్ నిస్పాల్ సింగ్‌ను వివాహమాడిన కోయెల్‌కు కుమారుడు కబీర్, కుమార్తె (2024) ఉన్నారు. రాజ్యసభ ఎంపీగా కొత్త రాజకీయ ఇన్నింగ్స్ ప్రారంభించనున్న కోయెల్ మల్లిక్ నిర్ణయంపై బెంగాల్ సమాజం ఆసక్తిగా గమనిస్తోంది.