ప్రపంచవ్యాప్తంగా మద్యం సేవించే అలవాట్లలో ఒక విలక్షణమైన మార్పు చోటుచేసుకుంటోందని ప్రసిద్ధ వైద్య పరిశోధనా పత్రిక ‘అన్నాల్స్ ఆఫ్ ఇంటర్నల్ మెడిసిన్’ ప్రచురించిన అధ్యయనం వెల్లడించింది. 2022 నుంచి 2024 మధ్య కాలంలో అమెరికాలో సేకరించిన డేటా ఆధారంగా నిర్వహించిన ఈ అధ్యయనం ప్రకారం, 40 సంవత్సరాల కంటే తక్కువ వయస్సు ఉన్న యువత, జెన్-జీలో మద్యం తాగే అలవాటు క్రమంగా తగ్గుతోంది. అదే సమయంలో, 50 నుంచి 64 సంవత్సరాల వయస్సు గల సీనియర్ పౌరులలో మద్యం తాగేవారి సంఖ్య పెరగడమే కాకుండా, వారిలో కొందరు మునుపటి కంటే ఎక్కువ పరిమాణంలో మద్యం సేవిస్తున్నట్లు పరిశోధన స్పష్టం చేసింది.
కోవిడ్ మహమ్మారి తదనంతర కాలంలో యువత మద్యపానానికి దూరంగా ఉండే ట్రెండ్ కనిపిస్తోందని, అయితే 50 ఏళ్లు దాటిన వారు తీవ్రమైన మానసిక ఒత్తిడి కారణంగా మద్యపానాన్ని ఒక ఉపశమన మార్గంగా భావిస్తున్నారని ఈ అధ్యయనానికి నాయకత్వం వహించిన లివర్ నిపుణులు డాక్టర్ బ్రైన్ పి. లీ వెల్లడించారు. 50 ఏళ్లు దాటిన వారిలో ఇప్పటికే అధిక రక్తపోటు, డయాబెటిస్, స్థూలకాయం, కాలేయ, గుండె సంబంధిత సమస్యల ముప్పు ఎక్కువగా ఉండే అవకాశం ఉన్నందున, వీరిలో పెరుగుతున్న మద్యపానం తీవ్ర ఆరోగ్య ప్రమాదకరమని వైద్యులు ఆందోళన వ్యక్తం చేస్తున్నారు.
గణాంకాలు ఏం చెబుతున్నాయి? 40 ఏళ్లలోపు యువతలో మారుతున్న అలవాట్లు
ఈ నూతన పరిశోధనా పత్రంలో ప్రచురితమైన వివరాల ప్రకారం, అమెరికాలో 40 ఏళ్లలోపు వయస్సు ఉన్న వారిలో మద్యం తాగే వారి శాతం కాలక్రమేణా మారుతూ వచ్చింది. 40 ఏళ్లలోపు వారిలో 66 శాతం మంది మద్యం సేవించేవారు. మహమ్మారి కాలంలో ఈ సంఖ్య 69 శాతానికి పెరిగింది. 2022-2024 మధ్య కాలంలో ఈ సంఖ్య తగ్గి 67 శాతానికి పడిపోయింది.
ఈ 40 ఏళ్లలోపు జనాభాలో 26 నుంచి 30 ఏళ్ల వయస్సు గల జెన్-జీ వర్గం కూడా ఉంది. యువతలో మద్యం పట్ల ఆకర్షణ తగ్గి, దానికి దూరంగా ఉండే ధోరణి పెరుగుతోందని నివేదిక స్పష్టం చేసింది.
50 ఏళ్లు దాటిన వారిలో ఒత్తిడి, మద్యపానం పెరగడానికి కారణాలు
మరోవైపు, 50 నుంచి 64 ఏళ్ల వయస్సు గల వారిలో మద్యపానం పెరగడం ప్రత్యేకంగా ఆందోళన కలిగిస్తోంది. లివర్ స్పెషలిస్ట్ డాక్టర్ బ్రైన్ పి. లీ తెలిపిన వివరాల ప్రకారం.. ఈ వయస్సులోని వ్యక్తులు ఎదుర్కొంటున్న తీవ్రమైన మానసిక ఒత్తిడే వారు మద్యానికి ఆకర్షితులవ్వడానికి ప్రధాన కారణం.
40 ఏళ్లలోపు యువతలో ఒత్తిడి తక్కువగా ఉందని దీని అర్థం కాదని, కానీ 50 ప్లస్ వయస్సు వారు ఒత్తిడిని తగ్గించుకోవడానికి మద్యాన్ని ఎక్కువ పరిమాణంలో ఆశ్రయిస్తున్నారని ఆయన వివరించారు. ‘ద గార్డియన్’ నివేదిక ప్రకారం, మానసిక ఒత్తిడి సమయాల్లో తాత్కాలిక ఉపశమనం కోసం మద్యం తాగడం ప్రారంభించే వారు, కాలక్రమేణా దానికి బానిసలుగా మారి సేవించే పరిమాణాన్ని క్రమంగా పెంచుకునే ప్రమాదం ఉంది.
సీనియర్లలో హెచ్చరిస్తున్న ఆరోగ్య ముప్పులు
50 ఏళ్లు దాటిన తర్వాత మద్యం ఎక్కువ తాగడం వల్ల కలిగే తీవ్ర ప్రమాదాలపై వైద్య నిపుణులు హెచ్చరిస్తున్నారు. ఈ వయస్సులో సహజంగానే పెరిగే హై బ్లడ్ ప్రెజర్, గుండె సంబంధిత వ్యాధుల ప్రమాదాన్ని మద్యం మరింత తీవ్రం చేస్తుంది. అధిక మద్యం సేకరణ వల్ల కాలేయానికి హాని కలగడంతో పాటు స్థూలకాయం, డయాబెటిస్ నియంత్రణ తప్పుతాయి.
కాబట్టి 50 ఏళ్ల తర్వాత మద్యం తాగడం పెరిగినా లేదా పాత అలవాటుగా కొనసాగుతున్నా, దానిని కేవలం సాధారణ అలవాటుగా పరిగణించి నిర్లక్ష్యం చేయకూడదని నిపుణులు స్పష్టం చేస్తున్నారు.
