14 నుంచి 20 ఏళ్ల వయస్సు గల యువత డబ్బును దాచడమే కాకుండా సరైన నైపుణ్యాలపై ఖర్చు చేయడం వల్ల భవిష్యత్తులో అది ఎలా మల్టిప్లై అవుతుందో ఈ మాస్టర్‌క్లాస్‌లో ఆయన సమగ్రంగా వివరించారు.

చిన్నప్పటి నుంచి కేవలం పొదుపు చేయడమే నేర్పిస్తారని, అయితే యువత వద్ద సమయం, శక్తి, నూతన విషయాలు నేర్చుకోవాలనే తపన ఎక్కువగా ఉన్నందున ఈ వయస్సులో సరైన మార్గాల్లో డబ్బు ఖర్చు చేయడం ఎంతో అర్థవంతమైనదని ఆయన పేర్కొన్నారు. విద్యార్థులు తమ వద్ద ఉన్న పరిమితమైన పాకెట్ మనీని సమర్థవంతంగా నిర్వహించుకోవడానికి 50-30-20 బడ్జెట్ సూత్రంతో పాటు ఇన్వెస్టింగ్, క్రెడిట్ కార్డుల వినియోగం ట్రేడింగ్ ప్రమాదాలపై నిశితమైన మార్గదర్శకాలను అందించారు.

‘మాయమయ్యే ఖర్చు’ వర్సెస్ ‘పెరిగే ఖర్చు’: కాంపౌండింగ్ మ్యాజిక్

సమాజంలో ప్రతి ఖర్చు రెండు రకాలుగా ఉంటుంది. మొదటిది ‘మాయమయ్యే ఖర్చు’ (Spending that Disappears) — అంటే స్నేహితులకు పార్టీలు ఇవ్వడం, వీడియో గేమ్‌లు కొనుగోలు చేయడం లేదా సినిమాలు చూడడం వంటివి, ఇవి కొన్ని రోజుల తర్వాత మాయమైపోతాయి. రెండవది ‘పెరిగే ఖర్చు’ (Spending that Grows) — అంటే కోడింగ్, వీడియో ఎడిటింగ్ వంటి నూతన కోర్సులు నేర్చుకోవడం, మంచి పుస్తకాలు లేదా కెమెరా వంటి పరికరాలను కొనుగోలు చేయడం, ఇవి భవిష్యత్తులో తిరిగి ఆదాయాన్ని తెచ్చిపెడతాయి.

ఇలా నైపుణ్యాలు, జ్ఞానంపై చేసే ఖర్చు ‘కాంపౌండింగ్’ (Compounding) సూత్రం ద్వారా గణనీయంగా పెరుగుతుందని ఆయన వివరించారు. ఉదాహరణకు ₹100 పెట్టుబడి ప్రతి నెలా 10 శాతం చొప్పున పెరిగితే అది ₹110, ₹121 గా ఎక్స్‌పోనెన్షియల్‌గా పెరుగుతుంది. ఇదే రీతిలో ఒకయువకుడు ప్రారంభంలో పోర్ట్రెయిట్ వేయడానికి 5-6 రోజులు తీసుకుంటూ ₹50-₹100 సంపాదించగా, నైపుణ్యం పెరిగిన తర్వాత కేవలం గంటలో పోర్ట్రెయిట్ పూర్తి చేస్తూ రూ. 1000 వరకు చార్జ్ చేయడం ప్రారంభించాడు. అంటే పెరిగిన ప్రతిభ, క్లయింట్ల నెట్‌‌వర్క్ వల్ల అతని ఆదాయం కాంపౌండింగ్ పద్ధతిలో విస్తరించింది.

50-30-20 బడ్జెట్ సూత్రం: విద్యార్థులకు పాకెట్ మనీ నిర్వహణ

విద్యార్థులు తమ వద్ద ఉన్న తక్కువ పాకెట్ మనీతో సమర్థవంతంగా ప్రణాళిక రచించుకోవడానికి 50-30-20 బడ్జెటింగ్ నియమాన్ని పాటించాలి.

బడ్జెట్‌లో 50 శాతాన్ని పుస్తకాలు, ప్రాజెక్ట్ ఫైళ్లు, స్టేషనరీ వంటి తప్పనిసరి అవసరాలకు వినియోగించాలి. 30 శాతాన్ని సినిమాలు, గేమ్‌లు లేదా మంచి బట్టల వంటి వ్యక్తిగత ఆనందానికి కేటాయించవచ్చు. మిగిలిన 20 శాతాన్ని ఎట్టి పరిస్థితుల్లోనూ తాకకుండా భవిష్యత్తు పొదుపుగా దాచాలి.

ఉదాహరణకు నెలకు ₹1000 పొందే విద్యార్థి ప్రతి నెలా ₹200 పొదుపు చేస్తే, ఏడాది చివరికి ఎలాంటి ఇబ్బంది లేకుండా ₹2400 ఆదా చేయవచ్చు. అలాగే స్వల్పకాలిక లక్ష్యాలు (హెడ్‌ఫోన్స్, బహుమతులు)సుదీర్ఘకాలిక లక్ష్యాలు (కోర్సులు, ల్యాప్‌టాప్, ట్రిప్స్) మధ్య సమతుల్యత పాటించడం వల్ల ఆర్థిక ఒత్తిడి ఉండదు.

అసెట్స్ వర్సెస్ లయబిలిటీస్

కాలక్రమేణా విలువ పెరిగే బంగారం, బిజినెస్ లేదా నైపుణ్యాలను అసెట్స్ (Assets) అని, విలువ తగ్గే మొబైల్ ఫోన్లు లేదా గాడ్జెట్లను లయబిలిటీస్. ఖరీదైన ఐఫోన్ వంటి లయబిలిటీలను కొనుగోలు చేసేటప్పుడు సమర్థవంతమైన మార్గాలను అనుసరించవచ్చు.

ఒకేసారి ₹2 లక్షలు చెల్లించకుండా కిస్తీల రూపంలో చెల్లించడం వల్ల మిగిలిన సొమ్ము బ్యాంకులో ఉండి వడ్డీని ఇస్తుంది. పాత మొబైల్‌‌ను ఎక్స్ఛేంజ్ చేయడం ద్వారా కొత్త ఫోన్ ధర తగ్గుతుంది. బ్యాంకులు అందించే క్రెడిట్ కార్డు డిస్కౌంట్లను సద్వినియోగం చేసుకోవచ్చు.

డెబిట్ కార్డ్ సొంత బ్యాంకు సొమ్మును ఖర్చు చేస్తుందని, కానీ క్రెడిట్ కార్డ్ బ్యాంక్ నుంచి రుణం తీసుకోవడమే. క్రెడిట్ కార్డ్ బిల్లును సమయానికి చెల్లించకపోతే 40 శాతం వరకు భారీ వడ్డీ పడుతుందని, అయితే సరైన సమయంలో చెల్లిస్తే క్యాష్‌బ్యాక్‌లు, ఆఫర్లు, ఎయిర్‌పోర్ట్ లాంజ్‌లలో ₹1కే అపరిమిత ఆహారం పొందే వెసులుబాటు వంటి ప్రయోజనాలు ఉంటాయి.

ఇన్ఫ్లుయెన్సర్ల ట్రాప్‌లో పడకండి

స్టాక్ మార్కెట్‌లో ఒక మంచి కంపెనీ షేర్లను అధ్యయనం చేసి దీర్ఘకాలికంగా పట్టుకోవడం ఇన్వెస్టింగ్ అని, స్క్రీన్ ముందు కూర్చుని రోజూ గంటల వ్యవధిలోనే షేర్లను కొనడం-అమ్మడం చేసేది డే ట్రేడింగ్. ఇన్ఫోగ్రాఫిక్‌లు లేదా సోషల్ మీడియా ఇన్ఫ్లుయెన్సర్లు చూపించే తప్పుడు సమాచారాన్ని నమ్మి యువత ట్రేడింగ్ ట్రాప్‌లో పడకూడదు.

స్థిరమైన ఆదాయం లేదా ఉద్యోగం, తగినంత పొదుపు, సంవత్సరాల తరబడి నేర్చుకున్న నాలెడ్జ్ లేనిదే ట్రేడింగ్‌కు దూరంగా ఉండాలి. సరైన ఆర్థిక అవగాహన కోసం మోనికా హలన్ రచించిన ‘లెట్స్ టాక్ మనీ’ పుస్తకాన్ని, ఎన్‌సిఈఆర్‌టి (NCERT) వారి ఫైనాన్షియల్ ఎడ్యుకేషన్ వర్క్‌బుక్స్ చదవాలి.