అనుకోకుండా మీ బ్యాంకు ఖాతాలో ₹1 కోటి జమయి, ఇకపై మీరు డబ్బు కోసం ఎప్పటికీ పని చేయాల్సిన అవసరం లేదని, బాస్ లేదా సోమవారం ఉదయం ఆఫీసు ఒత్తిడి ఉండదని తెలిస్తే మీరేం చేస్తారు? చాలామంది ప్రయాణాలు చేయడం, కార్లు కొనడం లేదా షాపింగ్ చేయడం వంటి సమాధానాలు చెబుతుంటారు. అయితే ఒకటి లేదా రెండేళ్ల వినోదం తర్వాత, ప్రతిరోజూ ఉదయం ఏం చేయాలనే ప్రశ్నకు స్పష్టమైన సమాధానం లభించక తీవ్ర గందరగోళానికి గురవుతుంటారు.
2021 నాటికి తమ 20ల వయస్సులోనే ఆర్థిక స్వాతంత్ర్యం సాధించిన అనేకమంది విశ్లేషకులు, లక్ష్యాన్ని చేరుకున్న తర్వాత ఒక రకమైన శూన్యతను, ఫ్రీడమ్ ట్రాప్ (స్వేచ్ఛా పంజరం)ను ఎదుర్కొన్నామని వెల్లడించారు. 9-టు-5 ఉద్యోగంలో లభించే స్థిరమైన నెలవారీ ఆదాయానికి అలవాటు పడటం, ఆపై ఉన్నట్టుండి ఆ నిర్మాణాత్మక దినచర్య (రూటీన్) కోల్పోవడంతో ఈ సమస్య తలెత్తుతుంది. ఆర్థిక స్వాతంత్ర్యం అనేది జీవితానికి అంతిమ గమ్యస్థానం కాదని, అది మన నిజమైన స్వేచ్ఛను ఎలా ఉపయోగించుకోవాలో నిర్ణయించుకునే ప్రారంభ స్థానం మాత్రమేనని క్షేత్రస్థాయి అనుభవాలు స్పష్టం చేస్తున్నాయి.
‘ఫైర్’ మోజు -నెలవారీ జీతం అడిక్షన్
2014 ప్రాంతంలో ప్రముఖ ప్రసిద్ధ మల్టీనేషనల్ కంపెనీలో మంచి జీతంతో ఉద్యోగం పొందినప్పటికీ, రోజూ ఒకే ఆఫీసు వాతావరణంలో గడపడం సఫోకేటెడ్‌గా అనిపించిందని ఆర్థిక విశ్లేషకులు చెబుతుంటారు. ఆ సవాలు నుంచి బయటపడటానికి ప్రయత్నించినప్పుడు నెలవారీ జీతం ఇచ్చే భద్రత అడ్డుగోడగా మారింది.
ప్రసిద్ధ రచయిత నసీమ్ తలేబ్ పేర్కొన్నట్లుగా “ప్రపంచంలో అత్యంత ప్రమాదకరమైన మూడు వ్యసనాల్లో మొదటిది డ్రగ్స్, రెండోది కార్బోహైడ్రేట్స్, మూడోది నెలవారీ స్థిర జీతం “.
ఈ జీతం అడిక్షన్ నుంచి బయటపడేందుకు, జీతంలో 50%పైగా పొదుపు చేస్తూ, ఒక్క రూపాయి కూడా అప్పు తీసుకోకుండా పెట్టుబడులు పెట్టడం ప్రారంభించారు. విదేశీ బ్లాగులైన ‘రిటైర్ బై 40’, ‘మిస్టర్ మనీ మస్టాచ్’ వంటి వాటి ద్వారా ‘ఫైర్’ భావనను అర్థం చేసుకుని, దానికి అనుగుణంగా ఆర్థిక ప్రణాళికలు రచించారు. లాక్‌డౌన్ సమయంలో ఉద్యోగం వదిలి, యూట్యూబ్ ద్వారా ఆర్థిక విజ్ఞానాన్ని పంచుతూ కేవలం 10 వీడియోలలోనే 1 లక్ష మంది సబ్‌స్క్రైబర్లను పొంది, తక్కువ వయస్సులోనే తమ ఆర్థిక లక్ష్యాన్ని చేరుకున్నారు.
మాస్లో అవసరాల శ్రేణి & ‘రాకీ’ ఉదాహరణ
డబ్బు ఉన్నప్పటికీ జీవితంలో అసంతృప్తి ఎందుకు కలుగుతుందో వివరించడానికి అబ్రహాం మాస్లో మానవ అవసరాల శ్రేణి సిద్ధాంతాన్ని పరిశీలించాలి.
- స్థాయి 5- ఆత్మ సాక్షాత్కారం : తన అత్యున్నత సామర్థ్యాన్ని (Potential) గుర్తించడం
- స్థాయి 4- గౌరవం & స్వేచ్ఛ : సమాజంలో గుర్తింపు -స్వతంత్ర నిర్ణయాలు
- స్థాయి 3- సామాజిక అనుబంధాలు : కుటుంబం, మిత్రులు, ఆత్మీయ సంబంధాలు
- స్థాయి 2- భద్రత : స్థిరమైన రాబడి, నివాస భద్రత, భవిష్యత్ రక్షణ
- స్థాయి 1- మనుగడ : ఆహారం, దుస్తులు, ప్రాథమిక అవసరాలు
15 సంవత్సరాల వయస్సులోనే కుటుంబ పోషణ కోసం పని చేయడం ప్రారంభించిన ‘రాకీ’ అనే వ్యక్తి ఉదాహరణను పరిశీలిస్తే:
మనుగడ (Level 1): మొదట ఆహారం, నివాసం కోసం పగలు రాత్రి కష్టపడటం.
ఆర్థిక భద్రత (Level 2): ప్రాథమిక అవసరాలు తీరిన తర్వాత స్థిరమైన రాబడి, భవిష్యత్ భద్రత కోసం శ్రమించడం.
సామాజిక అనుబంధాలు (Level 3): ఆర్థిక భద్రత లభించాక కుటుంబం, మిత్రులు, మంచి అనుబంధాల కోసం ఆరాటపడటం.
ఆత్మగౌరవం & స్వేచ్ఛ (Level 4): సమాజంలో గుర్తింపు, గౌరవం, స్వేచ్ఛ పొందడం.
ఆత్మ సాక్షాత్కారం (Level 5): ప్రాథమిక అవసరాలన్నీ పూర్తయ్యాక, తనలోని గరిష్ట సామర్థ్యాన్ని వెలికితీసి సమాజానికి తోడ్పడటం.
ఆర్థిక స్వాతంత్ర్యం సాధించిన తర్వాత కేవలం బీచ్‌లలో విశ్రాంతి తీసుకోవడం వల్ల కొద్దిరోజులకే విసుగు చెంది, తమలోని సామర్థ్యం వృథా అవుతోందనే అసౌకర్యం మొదలవుతుంది. చాలామంది లోన్ల ఊబిలో, తప్పుడు పెట్టుబడుల్లో చిక్కుకుని పోరాడుతుంటే, తాము కేవలం విశ్రాంతికే పరిమితమవ్వడం మానసిక అశాంతికి దారితీస్తుంది.
8-బెడ్‌రూమ్ ఇల్లు – రిగ్రెట్స్
నిరంతరం డబ్బు వెనుకే పరిగెత్తడం వల్ల జీవితంలో అసలైన విలువలను కోల్పోయే ప్రమాదం ఉందని ఒక విశ్లేషణ ద్వారా స్పష్టమవుతోంది.
ఒక వ్యక్తి ఎనిమిది బెడ్‌రూమ్‌లు ఉన్న పెద్ద భవనాన్ని నిర్మించడానికి రోజూ కష్టపడ్డాడు. ఆ క్రమంలో తన పిల్లలకు సమయం ఇవ్వలేదు, వారి స్కూల్ వార్షికోత్సవాలకు వెళ్లలేదు, వారి చిన్నతనాన్ని పూర్తిగా నిర్లక్ష్యం చేశాడు. పిల్లలు పెద్దవారై విదేశాలకు వెళ్లిపోయిన తర్వాత, ఆ వ్యక్తి వద్ద కోట్ల కొద్దీ డబ్బు, ఎనిమిది బెడ్‌రూమ్‌ల పెద్ద ఇల్లు ఉన్నాయి; కానీ ఆ ఇంట్లోని సగం గదుల తలుపులు ఎన్నటికీ తెరవలేదు. పిల్లలతో అనుబంధం లేకపోవడంతో వారు తిరిగి రాలేదు.
ఫైనాన్షియల్ ఫ్రీడమ్ ముఖ్య ఉద్దేశం – మనకు ఎంత డబ్బు సరిపోతుందో తెలుసుకుని, పరిమితులు విధించుకోవడమే. ఓవర్‌టైమ్ పని చేసే బదులు కుటుంబానికి సమయం ఇవ్వడం, అర్ధరాత్రి వరకు పని చేసే బదులు ఆరోగ్యానికి ప్రాధాన్యత ఇవ్వడమే నిజమైన స్వేచ్ఛ. సంపన్నులైన వ్యక్తులు వృద్ధాప్యంలో “అయ్యో, కుటుంబానికి ఎక్కువ సమయం ఇవ్వలేకపోయానే, ఆరోగ్యాన్ని నిర్లక్ష్యం చేశానే” అని బాధపడుతుంటారు.
మోర్గాన్ హౌసెల్ “టెంట్ ఉదాహరణ” & ఉద్యోగ ప్రశాంతత
‘సైకాలజీ ఆఫ్ మనీ’ రచయిత మోర్గాన్ హౌసెల్ ఒక ఆసక్తికరమైన ఉదాహరణను అందించారు. అడవి మధ్యలో భూమిపై ఒక గుడారంలో పడుకోవడం అనేది ఇద్దరు వేర్వేరు వ్యక్తులకు భిన్నమైన అనుభూతులను ఇస్తుంది. నివాసం లేక, అప్పుల భారాన్ని తట్టుకోలేక బలవంతంగా టెంట్‌లో పడుకునే వ్యక్తికి అది తీవ్రమైన మానసిక వేదనను కలిగిస్తుంది. అదే సొంత ఇల్లు, ఆర్థిక భద్రత ఉన్న వ్యక్తి సాహసం కోసం సరదాగా టెంట్‌లో పడుకుంటే అది అత్యంత రోమాంచితమైన అనుభవాన్ని ఇస్తుంది.
ఉద్యోగం చేయడం అనేది తప్పు కాదు. ఉద్యోగం మన జీవితానికి ఒక క్రమబద్ధమైన దినచర్యను , సహోద్యోగుల కలయికను, ఆఫీసు వేడుకలను, ఒక సమూహంలో భాగమయ్యామనే భావనను అందిస్తుంది. ఈఎమ్‌ఐ ఒత్తిడితో ఉద్యోగం చేయడం నరకం కాగా, వెనుక ఆర్థిక భద్రత ఉండి ఇష్టంతో ఉద్యోగం చేయడం ఎంతో ప్రశాంతతను, అత్యుత్తమ ఉత్పాదకతను ఇస్తుంది.
‘యువర్ మనీ లేదా యువర్ లైఫ్’
‘యువర్ మనీ లేదా యువర్ లైఫ్’ సిద్ధాంతం ప్రకారం – ఒక నిర్దిష్ట స్థాయి దాటిన తర్వాత అదనపు డబ్బు జీవితంలో ఆనందాన్ని పెంచదు. పేదవాడు డబ్బు లేక అల్లాడితే, సంపన్నుడు ఉన్న డబ్బును కాపాడుకోవడానికి, పెంచుకోవడానికి ఒత్తిడికి గురవుతాడు.
జీవితంలో సమస్యలు ఎప్పటికీ పూర్తిగా ముగిసిపోవు. కాబట్టి జీవితంలో సమస్యలే లేని స్థితి కోసం ప్రయత్నించడం కన్నా, మన మనస్సుకు నచ్చిన, అర్థవంతమైన సవాళ్లను ఎంచుకోవడమే ఆదర్శవంతమైన ఫైనాన్షియల్ గోల్ కావాలి.
